Бишкек, 01.10.19. /Кабар/. Ташкент шаарында өзгөчө оор кылмыштар менен соттолуп, издөөдө жүргөн Өзбекстандын жараны Баткен облусунун Кызыл-Кыя шаарынан кармалды. Бул тууралуу Баткен облустук Ички иштер башкармалыгынан билдиришти.
Билдирүүгө ылайык, Өзбекстандын жараны 2016-жылдан бери Баткен облусунда аты-жөнүн Бекболот Кошоков деп өзгөртүп жашап келген. Ал үй-бүлө курууга да жетишкен.
Кадамжай милициясынын баңги заттарын мыйзамсыз жүгүртүүгө каршы күрөшүү бөлүмүнүн жана 10-бөлүмдүн кызматкерлери тарабынан жүргүзүлгөн ыкчам иликтөө иштеринин натыйжасында кылмышкер Кызыл-Кыя шаарынан кармалды.
Тиешелүү иштерди жүргүзгөндө, кармалган жаран 1983-жылкы Аббосов Сайдуллахон экендиги аныкталды.
Аббосов Сайдуллахон 2010-жылы Өзбекстандын аймагында зордуктоо, адам өлтүрүү жана каракчылык беренелери менен жоопко тартылган. Жазасын өтөп жатып 2016-жылы Кадамжай районунун Исмат-Какыр айылы аркылуу мамлекеттик чек араны мыйзамсыз бузуп өтүп, Кызыл-Кыя шаарында жашырынып жашап жүргөн жеринен кармалган.
Аталган факты Кылмыштар менен жоруктардын бирдиктүү реестринин Кылмыш-жаза кодексинин 358-беренеси (чек араны мыйзамсыз бузуп өтүү) боюнча каттоого алынып, убактылуу кармоо жайына киргизилди.
Чогултулган материалдар УКМКга өткөрүлүп берилди. Азыркы күндө жарандын үстүнөн Кызыл-Кыя жана Кадамжай шаарынын бир нече тургундары тарабынан арыз түшкөн. Анткени, “Бекболот Кошоков ” эл ишенимине кирип, жалпы 300 миң сомго алдап жүргөнү аныкталган.
Пикир
Оставить комментарий