Бишкек, 29.11.23. /Кабар/. Жалал-Абадда бейтааныш адамды бычактап, изин жашырып жүргөн кылмышка шектүү жаранды кармады. Бул тууралуу облустук милициядан билдиришти.
Маалыматка ылайык, үстүбүздөгү жылы 24-апрелде Жалал-Абад шаарынын Манас көчөсүндөгү "Мажурум-Тал" кафесинде болгон бейбаштыкта 43 жаштагы Ж.Г. аттуу жаранды өзүнө бейтааныш болгон жаран ашкана бычагы менен ичине сайып, окуя болгон жерден качып кеткен.
Бул окуя Жалал-Абад шаардык ички иштер бөлүмүнүн кылмыштардын бирдиктүү реестрине КР Кылмыш-жаза кодексинин "Ден соолукка оор залал келтирүү" беренеси менен катталып, кылмыш иши козголгон.
Жалал-Абад облустук жана шаардык кылмыш иликтөө бөлүмүнүн кызматкерлеринин жүргүзгөн ыкчам-иликтөө иштеринин натыйжасында 27-ноябрь күнү аталган кылмышка шектүү катары Сузак районунун 42 жаштагы тургуну Э.Ж. кармалып, убактылуу кармоочу жайга киргизилген.
Аталган кылмышка шектүү уюшкан кылмыштуу топтун мүчөсү жана уюшкан топтордун лидери катары эсептелчү.
Пикир
Оставить комментарий