Жалал-Абадда бел боо күрөшү боюнча дүйнө чемпионатында ийгилик жараткан спортчулар сыйланды

Бишкек, 22.11.24. /Кабар/. Жалал-Абад шаарында бел боо күрөшү боюнча дүйнө чемпионатында ийгилик жараткан спортчулар сыйланды.

Муниципалитеттен билдиришкендей, шаар мэринин орун басары Гүлбарчын Таштанбекова Россиянын Казань шаарында өткөн бел боо күрөшү боюнча дүйнө чемпионатында ийгилик жараткан спортчуларды кабыл алды.

Таштанбекова спортчулардын жакындарына, машыктыруучуларына терең ыраазычылык билдирип, спортчулардын мындан ары да Кыргызстандын желегин бийик көтөрүштөрүнө тилектеш экендигин билдирди.

Белгилей кетсек, Татарстандын Казань шаарында өткөн дүйнө чемпионатына Кыргызстандын бел боо күрөшү боюнча улуттук курама командасынын катарында Жалал-Абад шаарынан 17 спортчу барып, Байтемир Акылбек уулу 68 кг салмакта 3-орунду, Феруза Курстанбек кызы 76 кг салмакта 2-орунду, Мырзайым Шайбекова 66 кг салмакта 3-орунду, Мадина Кожоярова 48 кг салмакта 2-орунду ээлеп, күмүш жана коло медалдарды багындырышкан.