Бишкек, 26.01.21. /Кабар/. Жалал-Абад шаарында 25-январдан тарта калктын жашоо шартын аныктоо үчүн үймө-үй кыдыруу башталды. Бул тууралуу шаардык мэриянын баса сөз кызматы билдирет.
Маалыматка ылайык, бир айга чукул убакытта аймактык башкармалыктар социалдык өнүктүрүү башкармалыгы менен биргеликте калааны үймө-үй кыдырып чыгышат.
“Бул аракет аркылуу үй-бүлөлүк зордук-зомбулукка жана турмуштун оор кырдаалына кабылган балдар, үй-бүлөлөр аныкталат. Андан тышкары туулгандыгы тууралуу күбөлүгү жок же ата-энеси миграцияда жүргөн, аз камсыз болгон үй-бүлөлөр жөнүндө маалымат чогултулат. Мүмкүнчүлүгү чектелген жарандар жана кароосуз карыялардын абалына анализ жүргүзүлөт, - деп белгилешти муниципалитеттен.
Үймө-үй кыдыруунун жыйынтыгы февраль айынын аяк ченинде чыгарылат. Ал менен коомдун көңүл буруучу катмары тууралуу так маалымат белгилүү болот.
Пикир
Оставить комментарий