Бишкек, 28.04.22. /Кабар/. Жалал-Абад шаарында өспүрүмдөр арасындагы кылмыштуулуктун алдын алуу максатында түшүндүрүү иштери жүрүп жатат. Бул тууралуу Жалал-Абад шаардык мэриянын басма сөз кызматы билдирет.
Маалыматка ылайык, социалдык тармактар аркылуу тарап жаткан ар кандай терс көрүнүштөрдүн, зордук-зомбулуктун алдын алуу боюнча Жалал-Абад шаарындагы мектептерде түшүндүрүү иштери колго алынды. Ата-энелер жана өспүрүмдөр менен болгон жолугушууга Жалал-Абад шаарынын вице-мэри Гүлбарчын Таштанбекова баштаган мекеме-ишканалардын жетекчилери барышты.
Жыйында социалдык тармактар аркылуу жайылтылган ар түрдүү коомго жат көрүнүштөрдөн алыс болуу керектиги эскертилип, ата-энелерге балдарынын жүрүм-турумун жана уюлдук телефондорун көзөмөлгө алуу милдеттендирилди.
Ошондой эле "Үй-бүлөлүк зомбулук балдардын келечегине катуу сокку!” аталышындагы видеоролик көрсөтүлүдү.
Белгилей кетсек, Жалал-Абад шаарында жыл башынан бери 4 өспүрүмгө кылмыш иши козголгон.
Пикир
Оставить комментарий