Бишкек, 13.05.21. /Кабар/. Өкмөттүн Ош облусундагы ыйгарым укуктуу өкүлү Жарасул Абдураимов Кара-Кулжа жана Өзгөн райондорундагы сел жүргөн айылдар менен жеринен таанышты. Бул тууралуу облустагы өкүлчүлүктөн кабарлашты.
Маалыматка ылайык, иш сапардын алкагында Кара-Кулжа районунун тургундары менен жолугуп, селдин кесепетинен жабыркаган жайларды калыбына келтирүүгө аракеттер жүрүп жатканын билдирди.
Кара-Кулжа районунда 200гө жакын үйгө суу кирип, 6 айылды бириктирген көпүрө кулап, бир нече гектар эгин талаасын суу ташкыны каптаган. Сары-Булак айлынын Таштак участкасынын 200гө жакын тургуну коопсуз аймактарга убактылуу көчүрүлгөн.
Өзгөн районунун Мырза-Аке, Ак Жар, Зергер айыл өкмөттөрдө короо-жайларына сел суулар кирген. Мырза-Аке айыл өкмөтүндө 32 турак үйдүн, Зергер айыл өкмөтүндө 10 турак үйдүн ичине кирген жана 5 турак үйдүн короосун суу каптаган. Чечебай айылында 4 турак үйдүн короолоруна суу кирген, Кандава айылында 5 турак үйдүн короолорун суу баскан жана Таш-Башат айылында 2 үйдүн короо сарайларына жана турак үйлөрүнө суу кирген.
Алай районунун Бүлөлү айыл аймагындагы Көл-Чаты айылына барчу ички чарбалык жолду сел суулар жеп кеткен жана айыл мечитинин короосуна суу кирген.
Кара-Суу районунун Кара-Сөгөт айылынын 800 метр ички чарбалык жолдоруна сел калдыктарын чыгарган, жана Катта-Талдык айыл аймагына караштуу 11 турак үйлөрдүн короолоруна, анын ичинде 2 турак үйдүн жер төлөсүнө, Папан айыл аймагына караштуу 2 турак үйдүн короосуна, анын ичинде 1 турак үйдүн жер төлөсүнө сел суулар кирген.
Азыркы учурда ѲКМ тарабынан селдин кесепетин жоюу жана тазалоо иштери, селден жабыркаган турак жайларды аныктоо жана келтирилген материалдык чыгымдарды тактоо жумуштары жүргүзүлүүдө.
Пикир
Оставить комментарий