Жеңиш Разаков Евразия экономикалык комиссиясынын Кеңешинин жыйынына катышты

Бишкек, 22.06.19. /Кабар/. Вице-премьер-министр Жеңиш Разаков Евразия экономикалык комиссиясынын Кеңешинин Минск (Беларус Республикасы) шаарында Евразия экономикалык биримдигинин (ЕАЭБ) вице-премьер-министрлеринин жана ЕЭК Коллегиясынын төрагасы Тигран Саркисяндын катышуусунда өткөн жыйынына катышты. Бул тууралуу өкмөттүн аппаратынын маалыматтык камсыздоо бөлүмү билдирди.

Кеңештин жыйынынын күн тартибинде 28 маселе каралган. Алар – интеграцияны өнүктүрүү, соода жаатында кызматташуу, эл аралык кызматташтык, ЕАЭБге мүчө мамлекеттердин жарандарын айдоочулук эмгек ишмердүүлүгү менен алектенүүгө уруксат берүү, бажы кызматташтыгы, өнөр жай, товарларды маркалоо, ошондой эле мамлекеттик (муниципалдык) сатып алууларды ишке ашыруу маселелери.

Жыйындын катышуучулары Евразия экономикалык биримдигинин евразия интеграциялык долбоорлорун жана программаларын башкаруу боюнча органын түзүү жана иштөө концепциясын талкуулашкан.

Ошону менен бирге «Санариптик сервис «ЕАЭБ Контрагенти» долбоору талкууланып, ЕАЭБ өлкөлөрүнүн зергердик өндүрүшүн өнүктүрүү боюнча иш-чаралар планы каралган.

Бул планда зергерлер рыногунун катышуучуларынын Кеңешин түзүү каралган. Ага бизнестин өкүлдөрү жана мүчө-мамлекеттердин ыйгарым укуктуу органдары кирмекчи.

Мындан тышкары жыйындын катышуучулары ЕАЭБ жана Сербия Республикасынын ортосундагы эркин соода аймагы жөнүндө Келишимдин долбоорун, ЕАЭБге мүчө мамлекеттердин алкоголдук продукцияларына акциздерине салык саясатын киргизүү принциптери жөнүндө Келишимдин долбоорун карап чыгышкан.

Ошондой эле интеграциялык биримдиктин мүчө өлкөлөрүнүн тамеки продукцияларына акциздерине салык саясатын киргизүү принциптери жөнүндө Келишимдин долбоорунун ички мамлекеттик процедураларды өткөрүү багыты жөнүндө чечим кабыл алынган.

Жыйындын катышуучулары ЕАЭБге мүчө мамлекеттердин бюджеттеринин ортосунда ташуу үчүн бажы алымдарынын суммасын бөлүштүрүү ченемдери маселесин талкуулашкан.

Армения Республикасы жана Кыргыз Республикасы үчүн учурда иштеп жаткан ченемдерди белгилөө менен ташуу үчүн бажы алымдарын бөлүштүрүү ченемдерин эсептөө ыкмасы боюнча иштерди улантуу чечими кабыл алынган.

Кеңештин мүчөлөрү Евразия өкмөттөр аралык кеңешинин 2019-жылдын 9-августунда Чолпон-Ата шаарында (Кыргыз Республикасы) өтө турган жыйынынын күн тартибин жактырышкан.