• 88.85
  • 94.81
  • 0.95

Жээнбеков: БАдагы интеграция биргелешкен экономикалык мүмкүнчүлүктү ийгиликтүү ишке ашыруу үчүн чоң мааниге ээ

Президент 0

Бишкек 29.11.19. /Кабар/. Борбордук Азиядагы интеграция биргелешкен экономикалык мүмкүнчүлүктү ийгиликтүү ишке ашыруу үчүн чоң мааниге ээ. Бул тууралуу Кыргызстандын президенти Сооронбай Жээнбеков Ташкент шаарында өтүп жаткан Борбордук Азия мамлекет башчыларынын экинчи консультативдик жолугушуусунда билдирди.

Өлкө башчысынын айтуусунда, ошону менен бирге бул мүмкүнчүлүктөр тоскоолдуктардан улам толугу менен пайдаланылбай жатат. Өлкөлөр арасындагы соода жүгүртүүнүн көлөмү төмөн бойдон калып жатат.

"Кээ бир азык-түлүктөрдү экспорттоого тыюу салынып, чек арада жүктөрдүн документтерин даярдоодо бюрократия орун алууда. Биздин өз ара пайдалуу экономикалык мамилелерге чектөөлөр жана пошлиналар терс таасирин тийгизип жатат. Адамдардын, товарлардын, кызматтардын жана капиталдын эркин кыймылы үчүн бардык тоскоолдуктарды жоюшубуз зарыл", - деп баса белгиледи Сооронбай Жээнбеков.

Мамлекет башчысы кошумчалагандай, тиешелүү мамлекеттик органдар өз ара пайдалуу соода жүргүзүү үчүн жагымдуу шарттарды түзүп бериши керек.

"Баарынан мурда — өз ара соода жүгүртүүнү өстүрүү, эркин соода режимдин толук иштешин камсыз кылуу үчүн чараларды көрүү керек. Бир жагынан — төмөнүрөөк бааларды жана акциздерди белгилөө боюнча кызматташуубуз аймактын ичинде чыгымдардын кыскарышына алып келиши мүмкүн. Экинчи жагынан — бажы жол-жоболорун жөнөкөйлөтүп, товарлардын чек арадан өтүшүн жеңилдетип, тоскоолдуксуз транзитти камсыз кылып, логистиканы жакшыртуу зарыл. Ошондой эле ишкердик субъектилер жана аймактагы өлкөлөрдүн ортосунда ар кандай биргелешкен ишканаларды түзүү жолу менен кызматташууну өнүктүрүү маанилүү деп эсептейбиз", - деди ал.

Жээнбеков билдиргендей, аймактагы өлкөлөр Кыргызстан үчүн соода-экономикалык тармакта артыкчылыктуу өнөктөштөр болуп саналат.

"Аймактагы соода-экономикалык кызматташтыктын маанисин эске алуу менен Кыргызстан өз рыногун Борбордук Азиянын товарлары үчүн ачык бойдон калтырат. Ошол эле учурда биз да өзүбүздүн продукцияны өз ара пайдалуу шартта экспорттоо үчүн өнөктөш-өлкөлөрдүн рыногуна эркин кирүүгө мүмкүнчүлүк алууну күтөбүз. Кыргызстан аймактардагы өлкөлөрдөн инвестицияларды тартууга кызыкдар. Инвестициялык долбоорлорду ишке ашыруу үчүн биздин экономиканын бардык секторлору тоскоолдуксуз ачык", - деп айтты президент Жээнбеков.

Пикир

Оставить комментарий