Бишкек, 02.11.19. /Кабар/. Президент Сооронбай Жээнбеков маданият жана искусство ишмерлерин бүгүн, 2-ноябрь күнү болгон кесиптик майрамы – Маданият кызматкерлеринин күнү менен куттуктады. Бул тууралуу президенттин аппаратынын маалыматтык саясат бөлүмү билдирди.
Мамлекет башчысынын куттуктоосунун тексти:
«Урматтуу маданият жана искусство ишмерлери!
Сиздерди кесиптик майрамыңыздар – Маданият кызматкерлеринин күнү менен чын дилимден куттуктайм!
Маданият – коомдук жүрүм-турумдун нормаларынын системасы, ыймандуулук жана интеллектуалдык байлыктын, элибиздин дүйнө таанымынын казынасы.
Сиздер улуттук асыл дөөлөттөрүбүздү, кылымдардан бери келе жаткан нарктуу салтыбызды азыркы муунга сиңирип, урпактарга жеткирүүгө багытталган эмгегиңиздер менен коомубуздун урматына ээ болдуңуздар.
Көөнөрбөс руханий мурасыбызды бөксөртпөй сактоого, элибиздин маданий казынасын байытууга кошкон баа жеткис салымыңыздарды жогору баалайбыз.
Маданият чөйрөсүнүн жаш муундардын мекенге, дүйнөгө болгон көз карашын калыптандырууга, аларды мекенчилдикке, атуулдук намыска, жаратмандыкка тарбиялоого кошкон салымы баа жеткис.
Мамлекет тарабынан маданиятыбызды, ата-бабаларыбыздан калган көөнө өнөрүбүздү сактап, андан ары өркүндөтүүгө өзгөчө көңүл бөлүнүп жатат.
Бардык багытта – адабият, театр, кино, сүрөт, музыка жаатында жаңы табылгалар менен улуттук маданиятты өнүктүрүп жатканыңыздар үчүн ыраазылык билдирем.
Сиздердин баарыңыздарга бекем ден соолук, бакубат жашоо, чыгармачылык ийгиликтерди каалайм!»
Пикир
Оставить комментарий