Бишкек, 01.07.23./Кабар/. Министрлер кабинетинин төрагасынын орун басары Бакыт Төрөбаевдин жетекчилиги астында айлана-чөйрөгө жана адамдардын саламаттыгына зыян келтирген желимден жасалган буюмдардан экологиялык жактан таза кагаздан жасалган буюмдарга өтүүнү көздөгөн"Ысык-Көлдү сактайлы" аталышындагы маалыматтык кампания болуп өттү.
Белгилей кетсек, бул иш-чара Ысык-Көлдү сактоо жана биосфералык зонасынын экологиялык кыйроосун алдын алуу, ошондой эле экологиялык коопсуздукту камсыз кылуу максатында чыгарылган, президенттин “Ысык-Көлдүн экологиясын сактоо боюнча кечиктирилгис чаралар жөнүндө” Жарлыгын ишке ашыруунун алкагында ɵткɵрүлдү.
Өз сөзүндө Бакыт Төрөбаев Ысык-Көл 2001-жылы ЮНЕСКО тарабынан Бүткүл дүйнөлүк биосфералык резервуар тутумуна киргизилип, дүйнөдөгү эң кооз 15 көлдүн катарына киргенин билдирди.
“Президентибиз Ысык-Көлдү коргоо боюнча Бирдиктүү программаны кабыл алды, узак убакытка чейин жүргүзүлүүчү системалуу иштер башталды. Эгерде мындай комплекстүү иш-чаралар жакынкы 5-7 жыл аралыгында толук иштей турган болсо, анда 10 жылдын ичинде Көлүбүз жакшырат”, - деди ал.
МинКаб Төрагасынын орун басары ошондой эле “жыл сайын адамзат 430 млн тонна пластмасса чыгарат. БУУнун айлана-чөйрө боюнча программасы (ЮНЕП) “Агымды токтот” чакырыгы менен 2040-жылга чейин пластикти 80%га кыскартуу керектигин айтканын” кошумчалады.
“Керемет жерибиз болгон Ысык-Көлүбүз дүйнө эле суктана турган, туристтер агылып келе турган жерге айлансын десек, алгач өзүбүздөн баштайлы, желимден жасалган буюмдарды сатууга жана колдонууда намыска келүү идеологиясын жүргүзүүгө чакырам”, - деп сөзүн жыйынтыктады Бакыт Төрөбаев.
Бул иш-чара калкты жана туристтерди полиэтиленден жасалган буюмдардын калдыктарынын экологияга, айлана-чɵйрɵгɵ жана адамдардын саламаттыгына тийгизген заяны жөнүндө кабардар кылуу максатын кɵздɵйт.
Мындан тышкары, Жогорку Кеңеш “Кыргыз Республикасынын аймагында полимер пленкасынан пакеттерди жүгүртүүнү чектөө жөнүндөгү” мыйзам долбоорун үчүнчү окууда колдогон.
Пикир
Оставить комментарий