Зыян 781 млн сом. Бишкек мэриясынын кызматкерлери мыйзамсыз эмгек акы алып жүрүшкөн

Бишкек, 13.03.23. /Кабар/. Бишкек шаарынын мэриясынын кызматкерлери мыйзамсыз түрдө 781 млн сом өлчөмүндө көбөйтүлгөн эмгек акы алышкан.

Бишкек шаардык прокуратурасы тарабынан Кыргыз Республикасынын Финансы министрлигинин Бишкек шаардык финансы башкармалыгында (БШФБ) Бишкек шаарынын өз алдынча башкаруу органдарынын кызматкерлерине эмгек акы төлөөгө бөлүнгөн бюджеттик каражаттарды пайдалануунун мыйзамдуулугуна карата текшерүү жүргүзүлдү.

Текшерүүдө, ар ай сайын эки маянанын өлчөмүнө чейин мыйзамсыз жогорулатуу менен кошумча үстөк акы төлөнүп келгендиги аныкталган.

Тактап айтканда, 2021-2022-жылдар аралыгында Бишкек шаарынын мэриясынын, Бишкек шаардык кеңешинин жана Бишкек шаардык финансы башкармалыгынын жооптуу кызмат адамдары өздөрүнүн кызмат абалын кызматтын кызыкчылыктарына каршы пайдаланып, өздөрү жана башка адамдар үчүн пайда көрүү максатында мыйзам талаптарын одоно түрдө бузушуп, Бишкек шаардык кеңешинин "Бишкек шаарынын 2021-2022-жылдарга бюджетин бекитүү жөнүндө" токтомдору менен жогоруда көрсөтүлгөн мыйзамсыз кошумча үстөк акылар каралып, натыйжада бюджеттик каражаттардын 781 млн 397,3 миң сомдун мыйзамсыз чыгымдалышына жана анын ысырапкорчулугуна жол берилип, мамлекетке өзгөчө ири өлчөмдө материалдык зыян келтирилген.

Аталган факты боюнча шаардык прокуратура тарабынан Кылмыш-жаза кодексинин 337-беренеси (“Кызмат абалын кыянаттык менен пайдалануу”) жана 210-беренеси (“Ишенип берилген мүлктү ыйгарып алуу же коротуу”) менен кылмыш иши козголуп, тергөө амалдары жүргүзүлүүдө.