Бишкек, 13.01.25. /Кабар/. Министрлер кабинетинин төрагасы Адылбек Касымалиев бул күндөрү Кытайдын Гонконг өзгөчө административдик районунда өтүп жаткан Азия каржы форумуна катышты жана баяндама жасады. Анда Кыргызстанды өнүктүрүүнүн артыкчылыктуу багыттарын белгилеп, чет элдик инвестиция үчүн жагымдуу мүмкүнчүлүктөрдү сунуштады.
Министрлер кабинетинин башчысы өз сөзүн Кыргызстандын 2021-2023-жылдарга карата экономикалык өсүштүн таасирдүү темптери менен баштады.
"Үч жылдын ичинде Кыргызстандын экономикасынын өсүү темпи орто эсеп менен 9%ды түздү. 2024-жылга карата маалыматтар дагы төмөн болбойт. ИДП эки эсе, мамлекеттик бюджет үч эсе өстү. Өлкө тездетилген өнүгүү этабына кирип жатат жана биз биринчи жана экинчи толкундун «жолборстору» болгон азиялык досторубуз мурда жасаган "ак илбирстин секиригин" алдыда жасагыбыз келет", - деди ал.
Ошондой эле өнүгүүнүн негизги багыттары: каржы секторун модернизациялоо, мамлекеттик башкарууну санариптештирүү, билим берүү жана илим тармагына инвестиция тартуу, стратегиялык долбоорлорду ишке ашыруу жана жеке сектор менен өнөктөштүк мамилелерди өнүктүрүү маселелери талкууланды.
Финансы секторун модернизациялоо жаатында Адылбек Касымалиев улуттук фонддук биржада акцияларды жана облигацияларды жайгаштырууга кыргызстандык компаниялардын активдүү катышуусун баса белгиледи. Бул рыноктун өсүшүнө жана ачык-айкындуулугунун жогорулашына өбөлгө түзөт.
Бул контекстте ал Гонконг фондулук биржасы менен кызматташууга кызыкдар экенин билдирди, анын айтымында, бул инвестиция тартуу жана кыргызстандык компаниялардын дүйнөлүк рынокко чыгуусу үчүн эффективдүү аянтча болуп саналат.
Адылбек Касымалиев ошондой эле эл аралык өнөктөштөр менен биргеликте “жашыл облигациялар” сыяктуу инновациялык каржы инструменттерин өнүктүрүүнү белгиледи.
Финансы секторун санариптик технологиялар аркылуу тез трансформациялоо, анын ичинде каржы тутумунун натыйжалуулугун жана ачыктыгын жогорулатуу үчүн иштелип чыккан улуттук санариптик валюта – санариптик сомду киргизүү белгиленди.
Санариптештирүү минкаб башчысынын айтымында, мамлекеттик башкаруунун сапатын жогорулатуу жана жарандар үчүн ыңгайлуулукту жогорулатуу үчүн жигердүү колдонулууда.
Билим берүү жана илим тармагында STEM билим берүүнү өнүктүрүүгө, илимий изилдөөлөргө инвестиция тартууга жана жогорку квалификациялуу адистерди даярдоо үчүн Google сыяктуу алдыңкы дүйнөлүк компаниялар менен кызматташууга өзгөчө көңүл бурулууда.
Адылбек Касымалиев Кыргызстандын инвестициялык мүмкүнчүлүктөрүнө да көңүл бурду.
"Тарыхый Жибек жолундагы пайдалуу географиялык жайгашуу Азия, Европа жана Жакынкы Чыгыштагы негизги рынокторго чыгууну камсыз кылат. Кытай – Кыргызстан – Өзбекстан темир жолунун курулушу аймактын логистикалык инфраструктурасын кыйла жакшыртат. Алтындын, сейрек кездешүүчү металлдардын жана гидроэлектр потенциалынын олуттуу запастары тоо-кен өнөр жайына жана энергетикага инвестиция тартуу үчүн кеңири перспективаларды ачат", - деген ал кубаттуулугу 1,86 ГВт болгон Камбар-Ата-1 ГЭСин куруу долбоорун мисал катары айтты.
Ал ошондой эле Кыргызстандын экологиялык таза продукциясы органикалык продукцияны кайра иштетүү жана экспорттоо боюнча биргелешкен ишканаларды түзүүгө мүмкүнчүлүктөрдү ачкан айыл чарба тармагынын чоң потенциалын белгиледи.
Өз сөзүндө минкаб башчысы өлкөдөгү жагымдуу инвестициялык климатка өзгөчө басым жасады.
"Кыргызстанда инвесторлор үчүн "ачык эшик саясаты" ишке ашырылды, анын ичинде салыктык жеңилдиктер, бизнести каттоонун жөнөкөйлөштүрүлгөн жол-жоболору жана чет өлкөлүк инвестицияларды мыйзамдык коргоо. "Тиешелүү өзгөртүүлөр өлкөнүн мыйзамдарына киргизилди, анда инвестициялык ишмердүүлүккө тоскоолдук кылган мамлекеттик кызматкерлердин жоопкерчилиги каралган", - деп белгиледи минкаб башчысы.
Гонконг дүйнөдөгү алдыңкы каржы борбору катары бизди мыктылыкка умтулуусу, кесипкөйлүгү жана замандын чакырыктарын чечүүдө инновациялык мамилеси менен шыктандырат.
"Кыргызстан сиздердин ишенимдүү өнөктөш болууга жана кызматташуу үчүн уникалдуу мүмкүнчүлүктөрдү сунуштоого даяр. Гармониялуу жана бакубат келечекке карай жол биргелешкен күч-аракетте", - деп сөзүн жыйынтыктады министрлер кабинетинин төрагасы.
Пикир
Оставить комментарий