Бишкек, 19.07.24. /Кабар/. Алайда 35 үй-бүлө мамлекеттин жардамы менен бизнес ачууга мүмкүнчүлүк алды. Бул тууралуу Эмгек, социалдык камсыздоо жана миграция министрлигинен билдиришти.
Маалыматка ылайык, үстүбүздөгү жылы облус боюнча жалпы квота 7 миң 85 үй-бүлөнү түзсө, анын 584ү Алай районуна туура келет.
Күн мурун министрдин орун басары Бакыт Дарманкул уулу Алай районуна болгон жумушчу сапарынын алкагында дагы 35 үй-бүлөгө 100 миң сомдун сертификаттарын тапшырды.
Мындан тышкары, ал Алай районундагы "социалдык контракт" долбоорунун ишке ашырылышына мониторинг жасап, каражат алган айрым үй-бүлөлөрдөн кабар алды.
"Бардык үй-бүлөлөр киреше гана алышпастан, бизнесин кеңейтүүнү да пландап жатышат. Бул “социалдык контракт” долбоорунун натыйжалуулугунун өтө олуттуу көрсөткүчү. Мисалы, Ак-Босого айылынын тургуну Айжамал Мамасадык кызы мурда беш баласына жөлөк пул алып келсе, бүгүнкү күндө 200 тоок сатып алып, айына 20 миң киреше табууда. Ал эми 2023-жылы Сары-Могол айылынын тургуну Гүлзада Абдурахманова 2 тигүүчү машина сатып алып, учурда ал киреше алып эле тим болбостон, эки жумуш ордун түздү", - деди ал.
Министрдин орун басарынын айтымында, эки жыл ичинде Ош облусунун Алай районундагы 352 аз камсыз болгон үй-бүлө мамлекеттен 100 миң сом алып, өз ишин баштаган.
Пикир
Оставить комментарий