Атамбаев Жалал-Абадда укук коргоо органдарынын кызматкерлери үчүн курулган көп батирлүү үйлөрдүн ачылышына катышты

Бишкек, 21.11.17 /Кабар/. Кыргыз Республикасынын Президенти Алмазбек Атамбаев бүгүн, 21-ноябрда, Жалал-Абад облусуна жасаган жумушчу сапарынын алкагында Жалал-Абад шаарындагы ички иштер органдарынын кызматкерлери үчүн курулган көп батирлүү үйлөрдүн ачылыш аземине катышты. Бул тууралуу президенттин аппаратынын маалыматтык саясат бөлүмү билдирди.

Мамлекет башчысы өз сөзүндө милиция кызматкерлерин жаңы конушу менен куттуктап, жаңы үйлөрдүн ачылышы аны үчүн майрамдык өзгөчө окуялар экендигин белгилеп өттү.

Президент Алмазбек Атамбаев укук коргоо органдарынын кызматкерлери үчүн бир нече үй салынгандыгын эске салып, декабрь айында Ош шаарында милиция кызматкерлери үчүн 200 батирлүү үйлөрдүн курулушу аяктаарын кошумчалады. “Мындай иштер Өкмөт жана кийинки Президент тарабынан улантылат. Анткени күч түзүмдөрүнө өзгөчө көңүл бөлүү зарыл. Кыргызстанда туруктуулук жана коопсуздук болушу үчүн ошол туруктуулукту жана коопсуздукту камсыз кылгандар күчтүү болушу керек. 2010-жылдагы трагедия учурунда армия менен милициянын жоктугунун кесепетин көргөнбүз”, -деди Президент.

Мамлекет башчысы акыркы алты жылда Кыргызстан өнүгүүдөгү өз жолун тапкандыгын белгиледи. “ Алты жыл мурда Кыргызстан талкаланып жок болот дешкен. Андай болгон жок. Азыр өлкө чыңдалып, күн санап гүлдөп баратат. Биз бул жолдон тайбашыбыз керек”, -деди Президент.

Алмазбек Атамбаев жарандарды биримдикти жана ынтымакты сактоого чакырды. “Кыргызстандын жарандарынын арасында улуттарга бөлүүгө жол берилбеши керек. Көп улуттуу кыргыз эли – бирдиктүү эл. Биздин күчүбүз биримдикте”, -деди ал.

Мамлекет башчысы сөзүн аяктап, үйлөрдүн короосунда балдар үчүн аянтча курууга 300 000 сомдук сертификат тапшырып, жаңы батирлерди кыдырып көрүп чыкты.