“Эмгек резерви” борбору "Алга" футбол клубунун базасы болот

Бишкек, 18.01.24. /Кабар/. “Эмгек резерви” республикалык дене тарбия жана спорт борбору "Алга" футбол клубунун жана олимпиадалык резервдин спорттук оюндарынын адистештирилген балдар-өспүрүмдөр мектебинин базасы болуп кызмат кылат. Бул тууралуу Бишкек мэриясы кабарлайт.

"Бишкекбашкыархитектура" муниципалдык ишканасы тарабынан иштелип чыккан алдын ала долбоорго ылайык, "Эмгек резерви" борборунун аймагына трибуналары бар стадион, машыгуу футбол аянтчалары, волейбол, баскетбол жана воркаут аянтчалары бар стадион куруу пландалууда. Спорт комплексин, амфитеатрды жана унаа токтотуучу жайды куруу, ошондой эле сейилдөөчү жайды (БЧКнын боюнда сейилдөөчү аянтча) куруу каралган.

Белгилей кетсек, Бишкек шаарынын мэри Айбек Жунушалиев “Эмгек резерви” республикалык дене тарбия жана спорт борборунда көчмө жыйын өткөрдү.

Жыйындын жүрүшүндө мэр кызматкерлерди ишке орноштуруу боюнча Бишкек шаарынын мэриясынын Дене тарбия жана спорт, туризм жана жаштар иштери боюнча департаментинин базасында түзүмдүк бөлүм түзүүнү тапшырды.

Мындан тышкары, Дене тарбия жана спорт, туризм жана жаштар иштери департаментине Капиталдык курулуш башкармалыгы жана "Бишкекбашкыархитектура" муниципалдык ишканасы менен биргеликте долбоорду ишке ашыруунун сметасын иштеп чыгуу тапшырылды.

Ошондой эле Айбек Жунушалиев борбордун аймагындагы жашыл аянтчаларды негизсиз кыюуга тыюу салып, талдоо жүргүзүп, калган көчөттөрдү калыбына келтирүү боюнча бардык чараларды көрүүнү тапшырды.

Жыйынтыгында муниципалитеттин башчысы Муниципалдык мүлктү башкаруу боюнча департаментине борбордун аймагында жайгашкан бардык кыймылсыз мүлктөрдүн мыйзамдуулугуна талдоо жүргүзүү милдетин койду.

Маалымат үчүн: "Эмгек резерви" республикалык дене тарбия жана спорт борбору буга чейин спорттук мелдештерди өткөрүү борбору болгон. 2023-жылдын 28-декабрында министрлер кабинетинин төрагасы Аакылбек Жапаров «Эмгек резерви» республикалык дене тарбия жана спорт борборунун жер тилкелерин, имараттарын жана курулуштарын Бишкек шаарынын муниципалдык менчигине өткөрүү жөнүндө токтомго кол койгон.