Бишкек, 31.10.19. /Кабар/. Бүгүн Бишкек шаарынын Свердлов райондук сотунда Бишкек Жылуулук электр борборун (ЖЭБ) модернизациялоо иши боюнча ачык соттук отурум өтүүдө. Сотто Инара Гилязетдинова төрагалык кылууда.
Отурумдун жүрүшүндө мурдагы премьер-министр Жантөрө Сатыбалдиев сурак бериши керек эле, бирок ал өзүн начар сезгендигине байланыштуу судья тыныгуу жарыялады.
Танапистен соң айыпталуучунун жактоочулары билдиришкендей, дарыгерлер Сатыбалдиевдин кан өлчөмүн текшерип, дары жазып беришкен.
Судья отурумду дүйшөмбүгө жылдырып, мындан кийин жактоочулар жана айыпталуучулар отурумга даяр болуп келиши керектигин баса белгилеген.
Эскерте кетсек, эксперттердин тыянагы боюнча “Бишкек ЖЭБин модернизациялоо” долбоорун даярдоо, кол коюу жана ишке ашыруудагы коррупция фактысынан мамлекетке 5 млрд. 439 млн. сом көлөмүндөгү зыян келтирилген.
Мындан улам, мурунку премьер-министр Сапар Исаков, экс-премьер-министр Жантөрө Сатыбалдиев, ЖКнын депутаты Осмонбек Артыкбаев, Улуттук энерго холдингдин мурунку башчысы Айбек Калиев, “Электр станциялары” ишканасынын мурунку башкы директору Салайдин Авазов, Улуттук энерго холдингдин башчысынын мурунку орун басары Жолдошбек Назаров, Бишкек ЖЭБин модернизациялоо башкарма тобунун директору Темирлан Бримкулов жана мурунку финансы министри Ольга Лавроваларга кызмат абалын кыянаттык менен пайдалануу жана коррупция боюнча айып тагылууда.
Пикир
Оставить комментарий