Бишкек шаарында "Дени сак болуу — модалуу" атту жүрүш өттү

Бишкек,18.05.24. /Айпер Кожоева - Кабар/. Бүгүн Бишкек шаарында "Дени сак болуу — модалуу” аттуу жүрүш өттү.

Иш-чара Бишкек шаарынын мэриясы тарабынан министрлер кабинетинин төрагасынын орун басары - Улуттук коопсуздук мамлекеттик комитетинин төрагасы Камчыбек Ташиевдин “Жаштар арасында наркобизнеске жана баңгизаттарды мыйзамсыз жүгүртүүгө каршы күрөшүү жөнүндө” тапшырмасына ылайык уюштурулган.

Акцияга Бишкек шаардык кеңешинин төрагасы Куванычбек Конгантиев жана Айсулуу Тыныбекова, Айпери Медет кызы баштаган спортчулар, жаш активисттер жана шаар тургундары катышты.

Иш-чаранын максаты — жаштар арасындагы баңгизаттарды мыйзамсыз жүгүртүү көйгөйүнө көңүл буруу жана бул терс көрүнүш менен күрөшүү боюнча коомдук кыймылды активдештирүү. Акция жаштар арасында сергек жашоо образын колдоого жана баңгизаттардан баш тарткан позитивдүү коомчулукту түзүүгө багытталган.

Белгилей кетсек, жүрүш Чүй проспектиси боюнча Манас проспектисинен Орозбеков көчөсүнө чейин жана Орозбеков көчөсү менен Чүй проспектисинен Т.Усубалиев атындагы аянтка чейин болду.

Иш-чара кыргыз эстрада жылдыздарынын катышуусунда концерттик программа менен уланды.