Бишкектин Чүй жана 7-Апрель көчөлөрүнүн кесилишинде жарылган түтүк толугу менен оңдолду

Бишкек, 20.11.19. /Кабар/. Бишкектин Чүй проспектиси менен 7-Апрель көчөсүнүн кесилишинде жарылган түтүк толугу менен калыбына келтирилди.

Муниципалитеттен билдиришкендей, "Бишкекжылуулук" ишканасынын кызматкерлери бир саат аралыгында жарылууну аныктап, үйлөрдөгү жылуулук системаны үзгүлтүккө учуратпай 24 сааттын ичинде бузулган түтүктү алмаштырды.

Учурда адистер тарабынан жолдун катмары калыбына келтирилип, жаңы асфальт төшөлүп жолду ачууга даярдык иштери көрүлүүдө.

Белгилей кетсек, Бишкек шаарынын жылуулук тармактарынын 80 пайызынын эскилиги жеткен. Мынан улам мэрия быйыл жолдорду оңдоонун жүрүшүндө бардык коммуникацияларды алмаштырууда.

Эскерте кетсек, 17-ноябрга караган түнү саат 02:30да Чүй проспектиси менен 7-Апрель көчөсүнүн кесилишинде суу түтүгү жарылып кеткен.