Дүйнө чемпионатына тандоо туру: Кыргызстандын курамасы 1-июндан баштап машыгууларын баштайт

Бишкек, 14.04.21. /Адил Төлөгөнов - Кабар/. Футбол боюнча Кыргызстандын курама командасы 1-июндан баштап машыгууларын баштайт. Бул тууралуу маалымат жыйында Кыргызстандын курама командасынын машыктыруучусу Александр Крестинин билдирди.

Анын айтымында, 29-майда футбол боюнча Кыргызстандын биринчилиги жыйынтыкталса, 30-майда курама команда чет өлкөгө учуп кетет.

“Кайсы өлкөгө учу турганы азырынча белгисиз. Бирок 1-июндан баштап футболчулардын машыгуусу башталат. Ошондой эле 3-июнда кайсы бир команда менен жолдоштук беттеш өткөрүү пландалууда. 7-июндан баштап ойной баштайбыз”, - дейт ал.

Эскерте кетсек, 7-15-июнда Кыргызстандын курама командасы футбол боюнча Дүйнө чемпионатынын Азия футбол конфедерациясы аймагындагы тандоо турунун алкагында Япония, Монголия жана Мьянманын командалары менен беттешет.

Кыргызстандын курамасы F тайпасында Япония, Тажикстан, Мьянма жана Монголия командалары менен орун алган. Учурда Кыргызстандын командасы 7 упай менен үчүнчү орунда келе жатат.