Бишкек, 19.07.19. /Адил Төлөгөнов - Кабар/. Францияда өткөн "Дүйнө балдары Францияда" аталышындагы эл аралык балдар фестивалында жаш артисттер Кыргызстанды таанытып келишти. Бул тууралуу Бишкек мэриясынан билдиришти.
CIOFF уюумунун чакыруусу менен №4 Балдар искусство мектеби, "Адис" вокал-хореографиялык ансамбли жана "Нур" фольклордук ансамблинин тарбиялануучулары Францияда өткөн фестивалга катышкан.
"Алар 15тен ашык бий түрүн жана улуттук аспаптар менен Кара-Жорго, Көчмөндөр, Шериктеш, Ала-Арча, Маш ботой, Эргимени көрсөтүштү. Ошондой эле, кыргыз улуттук кийимдери Франция элинин көңүлүн өзүнө тартты", - деп айтылат маалыматта.
Иш-чаранын негизги шарты фольклордук ансамблинин коштоосунда улуттук бий өнөрүн тартуулоо.
"Көрсөтүү салтка айланган аластоо менен башталды. Иш-чаранын жүрүшүндө кыргыздын улуттук тамак-ашы да көрсөтүлдү. Таанытуу программасы "Көчмөндөр" музыкалык чыгармасы менен аяктады", - деп кошумчаланат маалыматта.
Жаш артистердин турнеси Франциянын Париж шаарында аяктаган.
Пикир
Оставить комментарий