Бишкек, 22.07.18. /Кабар/. Кечээ, Борбор Азия тышкы иштер министрлеринин кеңешмесинин алкагында Чолпон-Ата шаарында Кыргызстан менен Өзбекстандын тышкы иштер министрлери Эрлан Абдылдаев жана Абдулазиз Камилов жолугушту.
КР ТИМдин басма сөз кызматы билдиргендей, тараптар КР президентинин Өзбекстанга болгон расмий сапарында (2017-жылдын 13-14-декабрь күндөрү, Ташкент шаары) макулдашылган келишимдерди ишке ашыруу, Өзбекстандын башчысы Ш.Мирзиёевдин түрк тилдүү өлкөлөрдүн саммитине катышуунун алкагында (2018-жыл 3-сентябрь, Чолпон-Ата шаары) Кыргызстанга боло турган сапары талкууланды.
Жолугушуунун жүрүшүндө кыргыз-өзбек алакаларын жакшыртуу, суу-энергетика, маданий-гуманитардык жана башка тармактардагы маселелер каралды.
Андан тышкары министрлер эки тараптуу кызматташтык маселелерин жана аны өнүктүрүүнүн келечегин жана 2018-жылга пландалган негизги иш-чараларды уюштуруу жана өткөрүү маселесин талкуулашты.
Пикир
Оставить комментарий