Бишкек, 09.10.24./Кабар/. Өлкөдө жасалма интеллект технологияларын ишке ашыруудагы маанилүү багыттардын бири жарандар менен баарлашуу үчүн чатботту колдонуу. Бул тууралуу санариптик өнүктүрүү министри Нурия Кутнаева Бишкекте өтүп жаткан жасалма интеллект боюнча форумда билдирди.
Анын айтымында, коомчулук менен өз ара аракеттенүүнү камсыз кылган чат-бот жарандардын суроо-талаптарын иштеп чыгуу, көп берилүүчү суроолорго жооп берүү жана суроо-талаптарды тиешелүү кызматтарга багыттоо үчүн иштелип чыккан.
"Чат-бот социалдык тармактар жана мамлекеттик кызматтардын веб-сайттары сыяктуу байланыш каналдары менен интеграциясы өкмөт менен жарандардын ортосундагы байланышты жакшыртууга, мамлекеттик кызматтарды жеткиликтүү жана колдонуучуга ыңгайлуу кылууга жардам берет", - дейт Кутнаева.
Бул демилгелер мамлекеттик башкарууну санариптештирүү жана санариптик трансформация чөйрөсүндө Кыргызстандын позициясын бекемдөө боюнча маанилүү кадам болуп саналат. Жасалма интеллектти мамлекеттик башкаруу процесстерине киргизүү ресурстарды пайдалануунун натыйжалуулугун жогорулатууга жана мамлекеттик органдар менен коомдун өз ара аракеттенүүсүн жакшыртууга мүмкүнчүлүк берери да кошумчаланды.
Жаңы технологияларды колдонуу туруктуу экономикалык өсүшкө жана жарандардын жашоо сапатын жакшыртууга өбөлгө түзөт.
Пикир
Оставить комментарий