Кыргызстандык ишкерлер Иран жана Дубайда болушту - иш сапардын жыйынтыгы

Бишкек, 11.05.23. /Кабар/. Өткөн жумада кыргызстандык ишкерлер жаңы өнөктөштөрдү табуу жана ишкердикти кеңештүү максатында Иран жана Дубайда болушту. КР Соода-өнөр жай палатасынын басма сөз кызматы иш сапардын жыйынтыгы тууралуу маалымат берди.

Белгиленгендей, Иранда Бендер-Аббас портунун болушу маанилүү учур болду, ал аркылуу Кыргызстандан продукцияларды жеткирүү жана башка өлкөлөргө реэкспорттоо мүмкүн.

"КР Соода-өнөр жай палатасынын президенти Темир Сариев башында турган Кыргызстандын делегациясы жана 42 ишкананын өкүлдөрү жыл сайын өтүүчү IRAN EXPO-2023 көргөзмөгө катышты. Ага дүйнөнүн 70 өлкөсүнөн 1000ден ашык чет элдик ишкерлер жана өнөр жайчылар келишти. Сапардын жыйынтыгында бир нече келишимдерге кол коюлуп, жаңы өнөктөштөр табылды", - деп айтылат маалыматта.

Ал эми Бириккен Араб Эмираттарында КР Соода-өнөр жай палатасы өзүнүн өкүлчүлүгүн ачты, анткени көптөгөн кыргызстандык компаниялар Дубайдын компаниялары менен жигердүү кызматташып, жаңы рынокторду издөөнү улантууда.

"Сапардын жүрүшүндө кыргыз делегациясы бизнес мамилелерди өнүктүрүүнү улантуу максатында Дубай палатасынын өкүлдөрү менен жолугушту. Делегациянын курамына КР Соода-өнөр жай палатасынын жетекчиси Темир Сариев, транспорттук-логистикалык компаниялардын, банк секторунун, эт азыктарын өндүрүүчүлөрдүн, Кыргызстандагы соода-логистикалык борборлорду курууга катышкан компаниялардын өкүлдөрү катышты. Алар Абу-Дабиде жыл сайын өтүүчү инвестициялык форумга катышты, анда туруктуу экономикалык өсүштүн жана өнүгүүнүн келечеги талкууланды. Форумдун алкагында КР Соода-өнөр жай палатасынын президенти ири инвесторлор менен бир катар жолугушууларды өткөрдү", - деп билдирди КР Соода-өнөр жай палатасы.

Иш сапардын алкагында кыргыз делегациясы эркин экономикалык аймактарга да барды. Ишкерлер Дубай жана БАЭ эркин экономикалык аймактарында бизнес мүмкүнчүлүктөрүн, анын ичинде компанияларды каттоонун шарттарын изилдешти. Чет элдик компанияларга өндүрүш ишканаларын, өкүлчүлүктөрдү жана биргелешкен ишканаларды ачууга мүмкүндүк берген Дубай өкмөтүнүн жаңы долбоору DubaiGlobalConnectке өзгөчө көңүл бурулду. Долбоор ошондой эле туруктуу көргөзмөгө ээ, анда DGC аймагында өндүрүлгөн товарлар жана буюмдар көрсөтүлөт. Бул платформа потенциалдуу өнөктөштөр менен жолугушууларды, сүйлөшүүлөрдү жана ар кандай көргөзмөлөрдү өткөрүү үчүн мүмкүнчүлүктөрдү берет.

Ошол эле учурда КР Соода-өнөр жай палатасы Кыргызстанда жергиликтүү ишкерлер тарабынан экономикалык активдүүлүк кыйла жогорулап жатканын баса белгиледи

Буга байланыштуу КР Соода-өнөр жай палатасы ата мекендик ишкерлер жаңы өнөктөштөрдү таап, бизнесин кеңейтүү үчүн бизнес-делегациялардын ар кайсы өлкөлөргө иш сапарларын уюштуруп келет жана ар кайсы өлкөлөрдүн базарын багындырууга жана Кыргызстанга инвестиция тартууга кызыкдар болгондуктан мындай сапарлар улана бермекчи.