Ленин районунан Жогорку Кеңештин депутатын шайлоого канча каражат чыгымдалды?

Бишкек, 20.06.23. /Кабар/. Борбордук шайлоо комиссиясынан Бишкек шаарынын Ленин районунан Жогорку Кеңештин депутатын шайлоону өткөрүүгө бюджеттен канча каражат кеткенин маалымдашты.

Ошентип, аталган бир мандаттуу шайлоо округунан ЖК депутатын шайлоого даярдык көрүү жана өткөрүүдө чыгымдардын сметасына ылайык 18 млн 636,5 миң бөлүнүп, анын ичинен 15 млн 413,9 миң сому чыгымдалды.

Пайдаланылбай калган каражат 3 млн 222,6 миң сомду түздү.

Белгилей кетсек, шайлоочулардын акыркы тизмесине киргизилген бир шайлоочуга кеткен чыгым 123 сом 40 тыйынды (15 413 863 сом/124 908 шайлоочу) түздү.

Эскерте кетсек, шайлоо 28-майда өттү. Алдын ала маалымат боюнча, Ленин бир мандаттуу шайлоо округунан Жогорку Кеңештин депутатын шайлоодо Дамира Ниязалиева жеңип чыккан.

Бирок, 29-майда БШК Дамира Ниязалиева тарабынан шайлоочулардын добушун сатып алуу мүмкүндүгү тууралуу билдирүү түшкөнүн маалымдаган. Кийин аталган факты боюнча кылмыш иши козголгон.

Мындан тышкары, Улуттук коопсуздук мамлекеттик комитети добуш сатып алуу фактысы боюнча талапкер Улан Сариевге кылмыш ишин козгогон.