Мектепте электрондук каттоо. Сентябрга чейин мектепке тартылбаган бала болбойт

Бишкек, 11.04.22. /Адил Төлөгөнов - Кабар/. Үстүбүздөгү жылдын 15-сентябрына чейин өлкө аймагындагы мектептерге тартылбаган бала болбойт. Бул тууралуу “Кабар” агенттигиндеги маалымат жыйынында Мектеп жана мектептен тышкаркы билим берүү башкармалыгынын башчысы Марат Усеналиев билдирди.

Анын айтымында, мектеп жашындагы балдарды 1-класска кабыл алуу mektep.edu.gov.kg маалыматтык системасы аркылуу эки этапта жүргүзүлөт. Биринчи этап: 11-апрелден 27-июнга чейин – катталган жери боюнча. Экинчи этап: 27-июндан 10-сентябрга чейин – учурда жашап жаткан жери боюнча.

“Электрондук каттоо бүгүн эле башталды, 15-сентябрга чейин (ред.: жаңы окуу жылынын башталышы) канча убакыт бар. Бардык бала окуйт. 15-сентябрга чейин өлкө аймагындагы мектептерге тартылбаган бала болбойт”, - дейт ал.

Усеналиев электрондук каттоо сайтында бүгүн техникалык мүчүлүштүк болгонун айтып, учурда ал иштеп жатканын кошумчалады.

Эскерте кетсек, бүгүн, 11-апрелде Билим берүү жана илим министрлигинин сайты аркылуу мектеп жана бала бакчаларга электрондук каттоо башталган.