"Ош" эл аралык аэропортунда иновациялык ILS системасы ишке кирди

Бишкек, 03.11.23. /Кабар/. Кызмат көрсөтүүнүн сапатын тынымсыз жогорулатуу жана коопсуздуктун жогорку стандарттарын камсыз кылуу максатында "Манас" ААКсы "Ош" эл аралык аэропортуна жаңы инновациялык конуу системасын – ILS (Instrument Landing System) киргизди. Бул тууралуу компаниянын басма сөз кызматынан билдиришти.

ILS – татаал аба ырайы шарттарында жана начар көрүнүү шартында так жана коопсуз конууга мүмкүндүк берген өнүккөн радионавигациялык технология. Система аэропорттун учуп-конуу тилкесине автоматтык түрдө конуу үчүн учактын бортундагы радиосигналдардын жана аспаптардын айкалышын колдонот. Бул система өзгөчө коюу туман, катуу жамгыр же кар жааган шартта учуунун коопсуздугун кыйла жакшыртат.

"Ош" эл аралык аэропортунда ILSти ишке ашыруу бир катар негизги артыкчылыктарга ээ. Биринчиден, бул авиациялык операциялардын ишенимдүүлүгүн жана коопсуздугун жогорулатат. Экинчиден, ILS системасы аэропорттун инфраструктурасынын натыйжалуулугун жогорулатууга жардам берет. ILSти ишке ашыруунун үчүнчү маанилүү аспектиси – бул Ош эл аралык аэропортунун дүйнөлүк аренадагы аброюн жогорулатуу.

ILS жаңы конуу системасы Кыргызстандын авиация тармагын өнүктүрүү үчүн жаңы горизонтторду ачып, өлкөнүн дүйнөлүк авиация тармагындагы позициясын бекемдөөгө жардам берет.

Иш-чаранын расмий ачылышына "МЭА" ААК Башкармалыгынын төрагасы Манасбек Самидинов, "МЭА" ААК өндүрүш иштери боюнча директору Бекбача уулу Бакытбек жана "МЭА" ААК Ош филиалынын директору Тимурлан Маданбеков катышты.