Бишкек, 5-июнь / Кабар /. Бүгүн, Ош облусунун Араван районунун борбордук мечитинде 2017-жылдагы ажылык сапарга баруучу жарандарга жана ажы башчыларга окутуу иштери башталды. Бул тууралуу Ош облустук казыятынын маалымат кызматы билдирди.
Аталган окуу семинары Кыргызстан Мусулмандарынын фатва бөлүмунүн башчысы Равшан ажы Эратов жана Ош облусунун казысынын орун басары Нурбек кары Орунбаев тарабынан өтүлүп, зыяратчыларга ажылык парзды өтөөгө туура ниет кылуу, ажылык кийимдерди эрежеси менен кийүү, курмандык чалуу, чач алуу, Арафат, Мина өрөөндөрүндөгү ажылыктын кыйынчылыктарына сабыр кылуу, ыйык Каабаны айлануу эрежелери үйрөтүлүүдө. Равшан ажы Эратовдун айтымында зыяратчыларга ажылык зыярат учурунда ибаадат жасоону шарият көрсөткөн тартиптен чыкпай жасоо жана Сауд Аравия мамлекетинин ажылык учурундагы коюлган эреже тартиптерин, мыйзамдарын тереңдетип үйрөнүүсүнө басым жасалып, убакытты так сактоо жана жоопкерчиликтүү болуу милдеттери түшүндүрүлүүдө. Бул иш-аракеттер ажылык зыяратты аткаруудагы кемчиликтерди кетирбөөгө жана сапарды жогорку деңгээлде уюштурууга жардам бермекчи.
Эскерте кетсек, аталган окуу семинарлары Ош облусунун башка райондорунда да уюштурулуп, ажы башчылар да өз алдынча кошумча сабактарды өткөрүп турушмакчы.
Пикир
Оставить комментарий