Штаб: COVID-19га каршы вакцина оор дарттардын алдын алууда натыйжалуу жана коопсуз

Бишкек, 05.08.22 /Кабар/. Республикалык штабдан билдиришкендей, COVID-19га каршы вакциналар оор оорулардын алдын алууда натыйжалуу жана коопсуз.

Кант диабети

Кант диабети COVID-19 менен коштолгон оору катары, гипергликемия жана башка күчөгөн коркунуч факторлору, мисалы, улгайган курак, семирүү, жүрөк-кан тамыр оорулары, артериялык гипертензия жана башка шарттарда инфекциянын кыйла оор өтүшүнүн коркунуч фактору болуп саналат.

COVID-19га каршы эмдөө кант диабети жана башка кошумча дарттар менен ооруган адамдардын ден соолугун жана коопсуздугун коргоонун маанилүү куралы болуп саналат. COVID-19га каршы вакциналар коронавирус, анын ичинде кант диабети менен ооруган адамдарда илдеттин оор түрүн жана өлүмдүн алдын алууда натыйжалуу жана коопсуз.

Вакцинадан кийин кандагы канттын көтөрүлүшүн көзөмөлдөө үчүн анын деңгээлин бир нече күн бою кылдаттык менен көзөмөлдөө зарыл.

Кургак учук

Кургак учук сыяктуу эле COVID-19 дагы негизги аэрогендик жугуу жолуна ээ, өпкөнү жабыркатат жана окшош клиникалык-рентгендик көрүнүшкө ээ, бул кургак учук менен ооруган бейтаптарда жаңы коронавирустук инфекциянын пайда болушунун жана жүрүшүнүн тобокелдик факторлорун жана клиникалык өзгөчөлүктөрүн табуу зарылдыгын аныктайт.

Кургак учук менен ооруган адамдарда COVID-19га чалдыккан башка адамдарга караганда ковиддин оор өтүшү жана начар натыйжалары болушу ыктымал.

Мурда ооруп айыккан же коштолгон кургак учук COVID-19га каршы эмдөө үчүн каршы көрсөткүч болуп саналбайт.

Кургак учук менен ооруган бейтаптарды COVID-19га каршы эмдөө дарылоонун негизги курсунан өткөндөн кийин, оң динамикада жана медициналык кызматкердин көзөмөлүндө жүргүзүлүшү мүмкүн.

COVID-19га каршы вакциналар дарттын оор түрүн, ооруканага жаткырууну жана вирустун бардык варианттарынан өлүмдү алдын алууда натыйжалуу. Бирок, эч бир вакцина 100% коргой албайт. Эмдөөнүн толук курсунан кийин да, сейрек учурларда, COVID-19ду жуктуруп алуу коркунучу сакталат.

60 жаштан ашкан жана ден соолугу начар адамдарда вакцинанын бир же эки дозасын кабыл алгандан кийин дайыма эле COVID-19га каршы жетиштүү иммунитет түзүлө бербейт. Максималдуу иммундук жоопту калыптандыруу үчүн 4-6 айдан кийин кошумча күчөтүүчү дозаны (бустер) алуу сунушталат.