Түркиядагы жер титирөө. Кыргызстандык куткаруучулар издөө-куткаруу иштерин улантууда

Бишкек, 10.02.23. /Кабар/. Түркияда жер титирөөнүн кесепетинен ураган имараттардын астынан кыргызстандык куткаруучулар тарабынан 34 жарандын сөөгү табылып чыгарылды. Бул тууралуу КР ӨКМдин басма сөз кызматы билдирди.

ӨКМдин куткаруучулары мерчемделген иш графикке ылайык, өз милдеттерин аткарууда. Ал эми жабыркаган жарандарга медицина кызматкерлери жардам көрсөтүүдө.

Белгилей кетсек, Түркиянын Кахраманмараш шаарына Кыргызстан 67 куткаруучу жөнөткөн. Ошондой эле алдыда боордош түрк элине колдоо көрсөтүү максатында кыргыз тарап биринчи учак менен 100 боз үй, 20дай жылууланган аскер чатырын жана мобилдүү ооруканага ылайыкталган бир чатыр жөнөтөт. Жер титирөөнүн кесепеттерин жоюу үчүн керектүү куткаруу механизмдери жана эки үйрөтүлгөн ит менен 100 куткаруучудан турган атайын топ экинчи учак менен барат.

Эскерте кетсек, 6-февралда таңга жуук Түркия жана Сириянын аймагында очогунда 7,8 баллга жеткен катуу жер титирөө катталып, бир нече шаар кыйраган. Кийин жер титирөө дагы кайталанып, анын күчү очогунда 7,6 баллга жеткен.

Учурда Түркияда жер титирөөдөн каза болгондордун саны 17 миң 674 адамга, жабыркагандардын саны 72 миң 879 адамды түзгөндүгү кабарланууда.