Бишкек, 22.01.19 /Кабар/. Хожент гарнизонунун аскердик соту милиция майору Шухрат Шамсиддиновдун ишин карай баштады. Ага өлкөдө тыюу салынган “Ислам кайра жаралуу” партиясынын мурдагы мүчөсү Комил Хожаназаровду кыйнаган деген айып тагылган.
Диний партиянын мурагы мүчөсү кезектеги суракка бир күн калганда өз жанын кыйган.
Бул боюнча Согди облустук ички иштер башкармалыгынын эки тергөөчүсүнө жана Тажикстан УКМКсынын Ашт райондук бөлүмүнүн кызматкерине кылмыш иши козголгон. 2018-жылы жайында тергөөчүлөрдүн бири Латифжон Юлдошев 13 жылга, атайын кызматтын өкүлү Мухаммад Наимов 12 жылга эркинен ажыратылган. Хожент гарнизонунун аскер соту аларды кыйноо колдонуу, мыйзамсыз кармоо же камакта тутуу, жалган көрсөтмө берүүгө мажбурлоо боюнча күнөөлүү деп тапкан.
Кылмыш ишинин үчүнчү фигуранты, Согди облусунун Ички иштер башкармалыгынын мурдагы тергөөчүсү Шухрат Шамсиддинов 2018-жылдын аягында Баткенде кармалган. Кыйноо колдонууга айыпталган милициянын майору 2017-жылдан бери Кыргызстан аймагында жашырынып жүргөн. Ага издөө жарыяланган.
Соттук угуулар жабык режимде өтүүдө, себеби бул ишке “жашыруун” деген мөөр басылган.
31 жаштагы Комил Хожаназаров 2017-жылы жайында өлкөдө тыюу салынган Ислам кайра жаралуу партиясынын 15 мүчөсү менен чогуу кармалып, сурактан кийин кайра бошотулган. Бирок 28-августта Согди облустук ички иштер башкармалыгындагы экинчи жолку суракка бир күн калганда өз жанын кыйган. Ал кыйноого кабылганы тууралуу видео кайрылуу калтырып кеткен.
Видеокайрылуудан кийин сөөктү эксгумация кылуу чечими кабыл алынып, аны кыйноого алуу фактысы боюнча кылмыш иши козголгон.
Пикир
Оставить комментарий