II Элдик курултай. Жайыл районунан келген делегат экологиялык милиция түзүүнү сунуштады

Бишкек, 16.12.23./Кабар/. Бишкекте Т.Сатылганов атындагы Кыргыз улуттук филармониясында мамлекеттик масштабдагы экинчи Элдик курултай ишин улантууда.

Курултайдын жүрүшүндө Чүй облусунун Жайыл районунан келген делегат Кыргызстанда турак жай маселеси курч тургандыгын айтат.

“Биз эгемендүүлүк алган убакта калктын саны 4,5 млн болсо, учурда 7 миллионго жетти. Бирок ошол 2,5 млн адамдын турак жай маселеси чечилген жок. Жайыл районундагы 12 айыл өкмөтүндө 5 миңден ашуун жаран жер алууга кезекте турат. Жерлерди трансформация кылып, үй салууга уруксат бериңиз”, - деп президентке карылды ал.

Ошондой эле ал Новониколаевка айылында жайгашкан "Джунда" заводу абаны жагымсыз жыттар менен толтуруп, азыркы күндө эл сыртка чыга албай калгандыгын айтты.

“Учурда калк арасында өнөкөт оорулар, аллергия күчөдү. Ошондуктан заводго кошумча фильтр коюу зарылдыгы турат”, - дейт ал.

Ошондой эле делегат Жайыл районунда экология милициясынын түзүүнү сунуштады.

Белгилей кетсек, Бишкекте президент Садыр Жапаровдун катышуусунда экинчи Элдик курултай өтүп жатат. Ага өлкөнүн бардык облустарынан жана аймактарынан 700 делегат, ошондой эле Жогорку Кеңештин депутаттары, министрлер кабинетинин мүчөлөрү жана өлкөнүн мамлекеттик органдарынын жетекчилери катышууда.

Иш-чара эки күнгө — 15-16-декабрга созулат.

Курултайдын жыйынтыгы боюнча экинчи элдик Курултайдын резолюциясы кабыл алынат.

Курултайдын максаты — мамлекет башчысынын эл менен түз байланышуусу, анда белгиленген аймактардан шайланып келген делегаттар менен пикир алмашат.

Экинчи элдик курултайды өткөрүү боюнча президенттин тиешелүү жарлыгы ушул жылдын августунда чыккан.

Белгилей кетсек, биринчи Элдик курултай 2022-жылдын 25-26-ноябрында өткөн. Анда өлкө аймагынан келген 1000дей делегат катышкан.