Кыргыз футболуна 100 жыл. Садыр Жапаров достук мелдешинин бомбардири аталды

Бишкек, 17.12.21. /Адил Төлөгөнов - Кабар/. Бүгүн, 17-декабрда, кыргыз футболунун 100 жылдыгына арналган футзал боюнча достук мелдеши өттү.

Достук мелдешинде 9 гол киргизген президент Садыр Жапаров беттештин бомбардири аталды.

Ал эми башкы байге – кубокту “Өнөр” командасы алса, экинчи орунду “Алга”, үчүнчү орунду “Президенттин администрациясы” командасы алды.

Оюн Бишкектеги “Газпром” комплексинде өтүп, чүчү кулактын жыйынтыгында алты команда эки тайпага бөлүнгөн:
А тайпасына “Алга”, “Бизнес” жана “ЖМК” командалары кирди;
В тайпасына “Президенттин администрациясы”, “Федерация” жана “Өнөр” командалары кирди.

В тайпасында “Президенттин администрациясы” командасы “Федерацияны” 3:2 эсебинде утса, “Өнөр” командасы менен 2:2 эсебинде тең чыкты. Ал эми тайпанын акыркы оюнунда “Федерация” командасы менен “Өнөр” 1:1 эсебинде тең чыккан.

А тайпасында “Бизнес” командасы “Алганы” 2:0 себинде утса, “Алга” “Журналисттерди” 3:1 эсебинде артта калтырды. “Бизнес” менен “Журналисттер” командаларынын ортосундагы оюну 4:0 эсебинде бизнесмендердин жеңиши менен аяктаган.
Мелдештин жарым финалына “Бизнес коомчулугу”, Өнөр”, “Алга” жана “Президенттин администрациясы” командалары көтөрүлгөн. Анда “Өнөр” командасы 2:1 эсебинде “Бизнес коомчулугун”, “Алга” командасы “Президенттин администрациясын” 4:2 эсебинде уткан.

Аталган турнирдин башкы максаттарынын бири өлкөдө спортту жайылтуу жана өнүктүрүү, ошондой эле сергек жашоо образына үндөө.

Беттештерге президенттин администрациясынын, ата-мекендик футболдун ардагерлеринин, жалпыга маалымдоо каражаттарынын, спорттук федерациялардын өкүлдөрүнүн, бизнес коомчулугунун жана маданият ишмерлеринин командалары катышты.