Бишкекте Азия чемпионаты жыйынтыкталды. Кыргызстандын куржунунда 14 медаль бар

Бишкек, 17.04.24. /Кабар/. Бишкекте спорттук күрөш (эркин күрөш, грек-рим күрөшү жана кыз-келиндер күрөшү) боюнча Азия чемпионаты жыйынтыкталды.

Мелдештер 11-16-апрель аралыгында “Бишкек Арена” шаардык муз аянтчасында өттү. Ага 20га жакын мамлекеттин курама командалары катышты: Кыргызстан, Казакстан, Өзбекстан, Түркмөнстан, Түштүк Корея, Кытай, Индия, Япония, Иран, Палестина, Ирак, Түндүк Корея, Монголия, Шри-Ланка, Ирак, Пакистан, Бахрейн жана Тажикстан.

• 11-12-апрель күндөрү эркин күрөш,
• 13-14-апрель кыз-келиндер арасында,
• 15-16-апрель грек-рим күрөшү боюнча беттештер орун алды.

Кыргызстандын байге куржунунда жалпы 14 медаль бар, анын ичинен 4 — алтын, 3 — күмүш жана 7 — коло.

Байгелүү орундарды багындырган эркин күрөшчүлөр:

• Тайырбек Жумашбек уулу (61 кг) — алтын
• Айаал Лазарев (125 кг) — күмүш
• Алибек Осмонов (70 кг) — коло
• жана Улукбек Жолдошбеков (65 кг) — коло медаль.

Жалпы командалык эсепте 121 упай топтоп кыргыз балбандары 3-орунду ээледи.

Кыз-келиндер күрөшү:

• Айсулуу Тыныбекова (62 кг) — алтын
• Айпери Медет кызы (76 кг) — алтын
• Арууке Кадырбек кызы (55 кг) — коло
• Гүлнура Таштанбекова (68 кг) — коло медаль.

Жалпы командалык эсепте Кыргызстандын кыз-келиндер күрөшү боюнча улуттук курама командасы 5-орунду ээледи.

Грек-рим күрөшү:

• Жоламан Шаршенбеков (60 кг) — алтын
• Акжол Махмудов (77 кг) — күмүш
• Раззак Бейшекеев (67 кг) — күмүш
• Бекзат Орункул уулу (82 кг) — коло
• Улан Муратбек уулу (55 кг) — коло
• Эрлан Манатбеков (130 кг) — коло медаль тагынды.

Грек-рим күрөшү боюнча улуттук курама жалпы командалык эсеп боюнча 2-орунду ээледи.

Белгилей кетсек, Азия чемпионатын өткөрүүгө мамлекет тарабынан 16 млн сом бөлүнгөн.