Бишкекте физиотерапевт жана реабилитологдордун эл аралык форуму өттү

Бишкек, 27.09.24. /Кабар/. Бишкекте И.Ахунбаев атындагы Кыргыз мамлекеттик медициналык академиясында физиотерапевттердин жана реабилитологдордун эл аралык форуму өттү.

Саламаттык сактоо министрлигинен билдиришкендей, анда реабилитация жана физиотерапия тармагында эмгектенген Кыргызстандык жана чет өлкөлүк алдыңкы адистер чогулду.

Форум саламаттык сактоо министрлигинин колдоосу менен Кыргызстандын Физиотерапевттер жана реабилитологдор ассоциациясы тарабынан уюштурулду.

Министр Алымкадыр Бейшеналиев форумдун катышуучулары менен амандашуу сөзүндө реабилитациялык медицина системасын мындан ары өнүктүрүү үчүн эл аралык билим жана тажрыйба алмашуунун маанилүүлүгүн баса белгиледи. Ошондой эле өлкөдө медициналык тейлөөнүн сапатын жогорулатуу үчүн инновациялык ыкмаларды киргизүүнүн жана адистердин квалификациясын жогорулатуунун маанилүүлүгүн белгиледи.

Кыргыз мамлекеттик медициналык академиясынын жыйындар залында уюштурулган форум реабилитация тармагындагы негизги темаларды камтыган түрдүү программаны камтыды. Иш-чаранын жүрүшүндө панелдик сессиялар өткөрүлүп, анда реабилитациялык кызматты уюштуруу, медициналык реабилитациялоонун заманбап аспектилери, балдарды реабилитациялоо, ошондой эле бейтаптарды дарылоодо мультидисциплинардык мамиленин маанилүү элементи катары медициналык-психологиялык жардам көрсөтүү маселелери талкууланды.

Форумдун маанилүү бөлүгү болуп Кыргызстандагы реабилитациялык кызматтардын абалына жана келечегине арналган панелдик сессия болду. Катышуучулар жаңы медициналык адистиктерди киргизүү, эл аралык тажрыйбаны жергиликтүү практикага киргизүү жана бул жаатта жеке секторду өнүктүрүү маселелерин талкуулашты.

Эл аралык эксперттер ошондой эле аппараттык физиотерапия, микрохирургиядан кийинки реабилитация, реабилитациялык медицинада өзөк клеткаларын колдонуу жана педиатриялык реабилитациядагы инновациялык ыкмалар сыяктуу темалар боюнча изилдөөлөрү жана тажрыйбалары менен бөлүшүштү.

Форумдун соңунда резолюциялар кабыл алынып, катышуучуларга сертификаттар тапшырылды, бул эл аралык кызматташтыкты чыңдоо жана Кыргызстандагы медициналык кызматтын сапатын жогорулатуудагы маанилүү кадам болду.

Форум адистерге билим алмашууга, реабилитация жана физиотерапияны өнүктүрүүнүн келечегин улуттук жана эл аралык деңгээлде талкуулоого мүмкүнчүлүк түздү.