Бишкекте көп кабаттуу үйдөн чыккан ири өрт өчүрүлдү

Бишкек, 11.01.25. /Кабар/. Бишкекте көп кабаттуу үйдөн чыккан ири өрт өчүрүлдү. Бул тууралуу Өзгөчө кырдаалдар министрлигинен билдиришти.

Маалыматка ылайык, 11-январга караган түнү Бишкек шаарынын Исанов көчөсүндө жайгашкан көп кабаттуу турак үйдүн электр калканынан өрт чыккандыгы тууралуу маалымат түшкөн.

Өрттү өчүрүүгө саат 03:35тен тарта жалпы 5 бөлүм, 3 автошаты жана штаб тартылып, өрт саат 05:54тө чектөөгө алынган.

Мындан тышкары, Кризистик кырдаалдарда башкаруу борборунун ыкчам тобу бирге иш алып барды.

Ошентип, өрт саат 08:42де толук өчүрүлдү. Өрттүн жалпы аянты болжол менен 500 чарчы метрди түздү.

Кошумча маалымат берилет.