Бишкек, 06.11.24. /Кабар/. «Бишкекжарык» ишканасына 6 жаңы автомунара алынды.
Муниципалитеттен билдиришкендей, Бишкек шаардык мэриясынан графикке ылайык бөлүнгөн каражаттын эсебинен «Бишкекжарык» муниципалдык ишканасынын автопаркына 6 заманбап аба автомунара алынып келинди.
Бул жабдуулар жогорку кубаттуулугу, ыңгайлуу кош кабина жана 23 метрге чейин бийиктикке кран көтөрүү мүмкүнчүлүгү менен мүнөздөлөт.
Буга чейин кызматкерлер эскирген жабдуулардын айынан кыйынчылыктарга дуушар болушкан, алардын айрымдары 40 жылдан ашык колдонулуп келген. Эми автопаркты жаңыртуунун аркасында электриктер ыңгайлуу шартта иштеп, кайрылуулардын аткарылышы эки эсе тезирээк болот.
Белгилей кетсек, жаңы келгендерди эске алуу менен ишкананын автопаркында 26 техника бар.
Мындан тышкары, ушул жылдын аягына чейин төмөнкү атайын техникалар келет:
- манипулятор – 1 даана;
- экскаватор – 1 даана.
Пикир
Оставить комментарий