Бишкек, 24.11.23. /Кабар/. Кыргызстанда бирдиктүү санариптик иш менен камсыз кылуу экосистемасы түзүлүүдө. Бул тууралуу эмгек, социалдык камсыздоо жана миграция министринин орун басары Улан Чаначев Азербайжанда өткөн Ислам Кызматташтык Уюмуна (ИКУ) мүчө-мамлекеттердин эмгек министрлеринин V конференциясынын жыйынында сүйлөп жатып билдирди.
Анын айтымында, 2019-жылдан тартып Эмгек министрлиги тарабынан эмгек рыногунун маалыматтык системасы киргизилген, ал иш менен камсыз кылуу чөйрөсүндөгү ишти автоматташтырууга мүмкүндүк берди.
"Бул системанын алкагында жумушсуз жарандарды ишке орноштурууда натыйжалуу ортомчулук кылуу үчүн бош жумуш орундарын издөөчүлөр, иш берүүчүлөр, кесиптик окуу курстары боюнча маалыматтар базасы түзүлгөн.
Эмгек рыногунун маалыматтык системасына «Занятость.kg», маалымат порталы интеграцияланган, бул социалдык медиа колдонуучуларынын кеңири аудиториясына арналган, ошондой эле майыптыгы бар адамдарга ылайыкташтырылган. «CV-matching» сервиси боюнча вакансиялар банкы жана резюмелер банкы өркүндөтүлдү, бош орундарды облустар, райондор, кесиптер боюнча издөөгө болот", - деди ал.
Улан Чаначев белгилегендей, Эмгек министрлиги zanyatost.kg сайтынын мобилдик версиясын, ошондой эле «Электрондук эмгек биржасы» мобилдик тиркемесин иштеп чыгып, ишке киргизген. Бул тиркемелерди жүктөп алуу менен сиз жумушка орношууга жардам берүү кызматтарын онлайн режиминде ала аласыз.
Пикир
Оставить комментарий