Бишкек, 28.04.20. /Кабар/. Кыргызстанда 28-апрелге карата коронавирус жуккандар менен жакын байланышта болгондордун саны 2 миң 915 адамга жетти. Бул тууралуу өкмөт үйүндө өткөн брифингде саламаттык сактоо министринин орун басары Нурболот Үсөнбаев маалымдады.
Анын айтуусуна караганда, алардын баары ПЧР-анализ ыкмасы менен текшерүүдөн өткөн, учурда дарыгерлердин көзөмөлүндө болушууда. Байланышта болгондордун саны эпидемиологиялык изилдөөлөрдүн жүрүшүндө өзгөрүшү ыктымал.
"Жүргүзүлгөн изилдөөлөрдүн саны – 49 484. Сутка ичинде 1 283 изилдөө жүргүзүлдү", - дейт ал.
Үсөнбаев кошумчалагандай, Кыргызстан боюнча обсервацияда 1 миң 12 адам жатат.
Белгилей кетсек, 28-апрелге карата Кыргызстанда коронавирус жуккан жаңы 13 учур аныкталып, өлкө боюнча COVID-19 вирусун жуктуруунун 708 учуру катталды. Алардын ичинен 185и медицина кызматкери, 416 адам айыгып, ооруканадан чыгарылды. Учурда стационарда 284 адам бар, алардын ичинен алтоо реанимацияда. Сегиз адам каза болду.
Пикир
Оставить комментарий