Бишкек, 26.08.24. /Кабар/. Нарын шаарында гурмандарды, элдик кол өнөрчүлүк чеберлерин жана жаратылыштын кооздугун жана салттардын байлыгын баалагандарды бириктирген өзгөчө иш-чара – "ЭтFEST" эт фестивалы өтөт.
Уюштуруучулар белгилешкендей, фестивалда конокторго Нарындын фермерлери тарабынан өндүрүлгөн экологиялык жактан эң таза эттен жасалган ар кандай тамактар сунушталат. Фестивалда кыргыз ашканасынын ар түрдүүлүгү жана бул аймактын атактуулугун арттырган эттин кеңири түрлөрү көрсөтүлөт.
"Аталган фестиваль Нарын шаарынын визиттик карточкасына айланып, Нарындын туруктуулугун жогорулатуу программасынын (NURP) туристтик акселерациясынын алкагында колдоого алынган", - деп айтылат маалыматта.
Бул күнү Нарындын бийик тоолорунун фонунда жана ачык асман астында конокторду бай программа күтөт. Фестивалдын негизги окуяларынын бири катары улуттук эт тамактарын жасоо сырларын ачып, жаңы рецепттерди даярдоонун өзгөчөлүктөрү менен бөлүшкөн шеф-поварлардын кулинардык мастер-класстары болот. Фестивалдын коноктору процессти гана көрбөстөн, тамак жасоого катышып, ошондой эле жаңы даярдалган деликатестерди сатып ала алышат.
Ошондой эле "ЭтFEST" кол өнөрчүлөрдү бириктирип, алар өздөрүнүн мыкты кол өнөрчүлүк буюмдарын: улуттук костюмдарды, зер буюмдарды, керамиканы, килемдерди жана башка көп нерселерди көрсөтүшөт. Ар бир жармаңкенин экспонаты – бул биздин элдин муундан-муунга өткөрүлүп берилген маданиятынын бир бөлүгү.
Белгиленгендей, иш-чаранын уюштуруучулары Кыргызстандын №1 акселератору Accelerate Prosperity жана боз үй глэмпингдеринин тармагы As a Nomad.
Пикир
Оставить комментарий