Бишкек, 21.04.20. /Кабар/. Нарында коменданттык саатты бузган 13 жаран кармалды. Бул тууралуу Нарын шаарынын жана Ат-Башы районунун коменданты Уланбек Аалиев билдирди.
Анын айтымында, Нарында сутка ичинде 14 кылмыш иши катталган.
"Коменданттык саатты бузган 13 жарандын сегизи Нарын шаарында, бешөө Ат-Башы районунда болгон. Нарын шаарында 4 автоунаа токтотулуп, протокол түзүлгөн", - дейт ал.
Аалиев белгилегендей, Ат-Башы районунда 188, Нарын шаарында 106 кызматкер кызмат өтөөдө.
Коронавируска байланыштуу Кыргызстандын Бишкек, Ош, Жалал-Абад шаары жана Ноокат, Кара-Суу, Сузак райондорунда киргизилген өзгөчө абалдын режими 30-апрелге чейин узартылды. Ошондой эле ал убакытка чейин өзгөчө абал тартиби Нарын шаары жана Ат-Башы районунда киргизилди.
Мындан улам өзгөчө абал киргизилген шаар жана райондордо 21:00-06:00 сааттар арасы коменданттык саат деп белгиленип, ал убакта көчөдө жүрүүгө тыюу салынды. Ал эми саат 06:00дөн 21:00гө чейин жарандар сыртка үч себеп менен чыга алышат: дүкөндөн азык-түлүк, дарыканадан дары-дармек сатып алуу жана ооруканага баруу үчүн. Сыртка чыкканда жарандардын жанында өздүгүн тастыктоочу документи жана маршруттук кагазы болуш керек.
Пикир
Оставить комментарий