Бишкек, 25.09.24. /Кабар/. Мамлекеттик салык кызматында онлайн кезек ээлөө функциясы менен жаңыланган электрондук кезек системасын киргизүү боюнча пилоттук долбоордун бет ачары болуп өттү.
Иш-чаранын жүрүшүндө Салык кызматынын төрагасынын орун басары Нургүл Салиева жаңы системанын мүмкүнчүлүктөрү жана артыкчылыктары менен таанышты.
Жаңыланган электрондук кезек менен салык төлөөчүлөр салык кызматтарын алуу үчүн кезекке жазылуунун үч ыкмасын колдоно алышат: бирдиктүү терезедеги терминал аркылуу, салык органында жайгашкан атайын QR-кодду сканерлөө аркылуу же Salyk.kg мобилдик тиркемеси аркылуу онлайн жазылуу.
Ошондой эле онлайн кезекке туруу салык төлөөчүлөргө барууну алдын ала пландаштырууга, күтүү убактысын азайтууга жана салык органдары менен өз ара аракеттенүүнү жакшыртууга мүмкүндүк берет.
Мындан сырткары ачык-айкындуулукту камсыз кылуу жана калктын ишенимин жогорулатуу үчүн тейлөө залдарында кызмат көрсөтүү процессин видеого жана аудиого жаздыруучу аппараттар орнотулат.
Жаңы система кызматтын сапатын баалоо кызматы менен интеграцияланган. Келгендер электрондук кезек талонундагы QR-кодду сканерлөө менен кызматкерлердин ишин баалай алышат. Ал ошондой эле тейлөө убактысы жана кызмат түрлөрү боюнча келгендердин саны, анын ичинде аналитикалык маалыматтарды чогултат. Бул маалыматтар көрсөтүлгөн кызматтардын сапатын жогорулатууга жардам берет.
Белгилей кетсек, учурда электрондук кезектин жаңыланган сервиси Бишкек шаарынын Ленин райондук мамлекеттик салык кызматынын башкармалыгында тестирлөөдөн өтүп жатат. Тестирлөө ийгиликтүү аяктагандан кийин ал аймактык салык органдарынын 27 бирдиктүү терезесине киргизилет.
Пикир
Оставить комментарий