Соттун чечимисиз адамды 48 саат эмес, 24 саат кармоо сунушталууда – Шерипов

Бишкек, 02.12.20. /Кабар/. Конституциялык кеңешмеде соттун чечимисиз адамды 48 саат эмес, 24 саат кармоо сунушталууда. Бул тууралуу маалымат жыйында Конституциялык кеңешменин “Адам жана жарандардын укуктары жана эркиндиктери” секциясынын жетекчиси Нурлан Шерипов билдирди.

Анын айтымында, учурдагы Баш мыйзамда эч ким соттун чечимисиз 48 сааттан ашык мөөнөттө кармалышы мүмкүн эместиги жазылган. "Азыр адамды 24 сааттан ашык кармоо мүмкүн эмес деген сунуш түштү. Ал аралыкта "тиешелүү органдар маалымат топтоп, сотко материалдарды берүүгө жетишеби?" деген суроолор болууда. Мындан улам эртең тиешелүү мамлекеттик органдарды жана коомдук уюмдардын мүчөлөрүн чакырдык. Алардын пикирлерин угуп жүйөлүү чечим кабыл алсак деп жатабыз", - дейт ал. Шерипов жарандарда адам укуктарына жана эркиндиктерине байланыштуу сунуштар болсо, келип оюн айта аларын эскертет.