Ысык-Көлдө жергиликтүү тургундун үйүнөн курал-жарак жана ок-дарылар табылды

Бишкек, 20.12.23. /Кабар/. Ысык-Көлдө жергиликтүү тургундун үйүнөн курал-жарак жана ок-дарылардын арсеналы табылды. Бул тууралуу облустук милициянын маалымат кызматынан билдиришти.

Мыйзамсыз ок-дарыларды сактоо боюнча билдирүү райондук милицияга ноябрдын ортолорунда түшкөн.

Маалымат райондук милицияга катталып, кылмыш иши козголгон.

Тергөөнүн жүрүшүндө курал-жарактарды жана ок-дарыларды мыйзамсыз сактап жүргөн жаран Ичке-Жергез айылынын 47 жаштагы Д.Т. аттуу тургуну экендиги аныкталып, жашаган жеринде тинтүү жүргүзүлгөн.

Анын жүрүшүндө милиция кызматкерлери тарабынан:

• 2 даана "ТОЗ-8" үлгүсүндөгү ок атуучу курал;
• 10 даана 7,62 калибрдеги жана 10 даана 5,45 калибрдеги ок;
• 1 даана бычак;
• 1 окуу гранатасы;
• баштыкка салынган жапайы кара куурайдын өзгөчө жыты бар кургатылган өсүмдүгү алынган — 1 кг 250 грамм.

Учурда соттук-баллистикалык жана соттук-химиялык экспертизалар дайындалып, тергөө амалдары жүрүүдө.