Бишкек ЖЭБин модернизациялоо: Чет элдик долбоорлордун бардыгы жергиликтүү адистер тарабынан адаптациядан өтүүсү керек - күбө

Бишкек, 17.02.20. /Кабар/. Бүгүн, 17-февралда Бишкек шаардык сотунда Бишкек Жылуулук электр борборун (ЖЭБ) модернизациялоо иши боюнча ачык соттук жараян өтүүдө.

Сотто Ирина Воронцова төрагалык кылууда. Шаардык сот айыпталуучулардын жактоочуларынын Свердлов райондук сотунун чечимине карата апелляциялык арызын кароодо.

Сотто айыпталуучулардан сурак алуу аяктап, учурда күбөлөр көрсөтмө беришүүдө. Жыйында "Энергопроект" Кыргыз институтунун жетекчиси Евгений Хафизов суралууда.

Эскерте кетсек, аталган уюм сметалык документти иштеп чыгып, анын негизинде айыпталуучулар мамлекетке $111 млн зыян келтирген деп тергөөдө күнөө коюлган. Анын айтуусу боюнча, алар адаптация боюнча комплекстүү иштерди жүргүзүшчү. Мамлекеттик курулуш агенттигинин мыйзамы боюнча чет элдик долбоорлор жергиликтүү адистер тарабынан адаптациядан өтүүсү керек. Жактоочуларга жооп берип жатып, Хафизов анын институту ишти так жана ак ниет аткаргандыгын айтты.

"Менде бар адамдар менен биз долбоордун энергетикалык бөлүгүн гана адаптациядан өткөрө алабыз, бирок, биз четтен элдерди жалдап, от казандарды жана башка бөлүктөрдү адаптациядан өткөрө алабыз", - деди Хафизов.

Күбө тендер тууралуу ал Мамлекеттик сатып алуулар порталынан билгендигин айткан. Буга чейин ал тууралуу маалыматы болгон эмес. Ал тек гана адаптацияга катышкан.

Бишкек шаарынын Свердлов райондук соту Бишкек Жылуулук электр борборун (ЖЭБ) модернизациялоо иши боюнча чыгарган өкүм:

- мурдагы премьер-министр, ошол кездеги КР президентинин аппаратынын тышкы саясат бөлүмүнүн жетекчиси Сапар Исаковду 15 жылга кесүү. Андан тышкары, мүлкү конфискацияланып, Кыргызстандын ыйгарым укуктуу элчиси дипломатиялык рангы, II даражадагы «Манас» ордени жокко чыгарылды. Ошондой эле мамлекеттик кызматтарда үч жылга чейин иштей албайт.

- «Улуттук энергохолдинг» компаниясынын мурдагы башчысы Айбек Калиев да 15 жылга эркинен ажыратылып, үч жылга чейин мамлекеттик кызматтарда иштебейт;

- Ошол кездеги премьер-министр Жантөрө Сатыбалдиев болсо 7 жыл 6 айга эркинен ажыратылды. Мамлекеттик кызматтарда үч жылга чейин иштей албайт;

- Ошол кездеги энергетика министри Осмонбек Артыкбаевге 5 миллион сом айыппул салынып, сот залынан бошотулду;

- «Электр станциялары» ишканасынын мурдагы жетекчиси Салайдин Авазов 11 жыл 3 айга эркинен ажыратылды. Мамлекеттик кызматтарда үч жылга чейин иштей албайт;

- «Электр станциялары» ишканасынын ошол кездеги жетекчисинин мурдагы орун басары Жолдошбек Назаров 2 жыл 6 айга эркинен ажыратылып, тергөө абагында отурган убакытты эске алуу менен сот залынан бошотулду;

- ЖЭБди модернизациялоо долбоорунун мурдагы аткаруучу директору Темирлан Бримкулов 2 жыл 6 айга эркинен ажыратылып, тергөө абагында отурган убакытты эске алуу менен сот залынан бошотулду;

- Мурдагы финансы министри Ольга Лавровага 3 миллион сом өлчөмүндө айып салынып, бошотулду.

Эскерте кетсек, эксперттердин тыянагы боюнча “Бишкек ЖЭБин модернизациялоо” долбоорун даярдоо, кол коюу жана ишке ашыруудагы коррупция фактысынан мамлекетке 5 млрд 439 млн сом көлөмүндөгү зыян келтирилген.