Бишкек, 09.04.22. /Кабар/. Сауд Аравиясы чет элдик жарандардын ажылыкка баруусуна уруксат берип, зыяратчылардын санын миллионго жеткирди.
Маалыматты “Кабар” агенттигине Кыргызстан мусулмандарынын дин башкармалыгынан ырасташты.
“Маалымат Сауд Аравиясынын Ажылык-умра министрлигинин сайтына чыкты. Бирок Кыргызстанга расмий түрдө маалымат келе элек. Эгер Сауд Аравиясынын аталган министрлигинен расмий билдирүү келсе, муфтият кайрылуу жасайт”, - деп белгилешти муфтияттан.
Сауд Аравиясынын билдирүүсүндө айтылгандай, COVID-19га каршы эмдөөдөн өткөн 65 жашка чейинки жарандарга ажылыкка барууга уруксат берилген. Чет өлкөлүктөр учуу алдында 72 сааттан эрте эмес жасалган терс жыйынтыгы менен ПЧР-тестин көрсөтүшү керек.
Сауд Аравиясынын Ажылык-умра министрлиги зыяратчылар ажылыкка келгенде өздөрүнүн ден соолугун жана коопсуздугун сактоо үчүн сактык чараларын көрүп, профилактикалык көрсөтмөлөрдү аткаруусу керектигин баса белгиледи.
Быйыл ажылык сапар 7-июлдан 12-июлга чейин белгиленген.
Пикир
Оставить комментарий