Бишкек, 18.02.19. /Кабар/. Баткен облусунда турак жайларга коркунуч жараткан таштарды коопсуз жерге жылдыруу иш-чаралары жүргүзүлдү.
ӨКМдин басма сөз кызматы билдиргендей, Баткен облусунун Лейлек районунун Катраң айыл аймагынын Өзгөрүш айылынын Асти-Дөөт тилкесинде жашаган адамдардын турак үйлөрүнө таш кулоо коркунучу жаралган.
Аталган аймакта 2019-жылдын 1-февраль күнү тоодон 0,8 метр куб көлөмдөгү таш кулап, 1 турак үйдүн сарайынын дубалын талкалаган. Адам өмүрүнө зыян келтирилген эмес.
Жерине жалпысынан 13 куткаруучу, жергиликтүү тургундардан 12 адам жана атайын техникалар тартылган.
"17-февраль күнү тартылган күчтөрдүн аракетинде аскадагы турак жайларга коркунуч жараткан таштарды коопсуз жерге жылдыруу иш-чаралары жүргүзүлгөн. Жалпы 27 метр куб таш жылдырылган", - деп айтылат маалыматта.
Пикир
Оставить комментарий