2018-жылдын 6 айында кыргызстандыктар 208 млрд. сом тапкан

Экономика 0

Бишкек, 22.11.18. /Кабар/. Быйылкы жылдын 6 айында Кыргызстандын калкынын акчалай кирешесинин номиналдык суммасы 208 млрд. 605,3 млн. сомду түздү. Бул тууралуу Улуттук статистика комитети билдирет.

Эсептөөлөр көрсөткөндөй, былтыркы жылдын 6 айына караганда быйыл кирише 23,3%га көбүрөөк болгон.

“Ошол эле учурда калктын акчалай кирешесинин булагы эмгек ишмердиги болуп, кирешенин жалпы көлөмүндөгү үлүшү 71%ды түзөт”, - деп белгилейт Улуттук статистика комитети.

Ал эми кыргызстандыктардын кирешелеринин реалдуу суммасы 203 млрд. 982 млн.сомду түзүп, былтыркы жылдын көрсөткүчтөрүнөн 20,6%га көп болгон.

Маалымдама: Номиналдык киреше – бир жаран же үй-бүлө белгилүү бир мезгил ичинде тапкан акчасынын суммасы.

Реалдуу киреше - бир жаран же үй-бүлө номиналдык кирешесине белгилүү бир мезгил ичинде сатып ала алган товар жана кызматтар.

Реалдуу кирешелердин өсүшү жалпы баалардын деңгээли менен номиналдык кирешенин пайыздык өсүш темпинин ортосундагы айырмасы катары аныкталат.

Пикир

Оставить комментарий