Талас, 16.09.19. /Кабар/. Талас облусунда бүгүн, 16-сентябрда биринчи Улуттук көчмөндөр оюндары башталды
Оюндун маданий бөлүгү – этношаарча, этнобазар жана башкалар – «Манас Ордо» комплексинин аймагында, ал эми спорттук ат оюндары Р. Алканов атындагы ат майданда, күрөштүн түрлөрү боюнча - «Газпром» дене тарбия жана ден-соолукту чыңдоо комплексинде өтөт.
Р. Алканов атындагы ат майданда бүгүн саат 16:00дө көк бөрү боюнча мелдеш башталып, анда Ош жана Нарын облусунун командалары беттешет. Көк бөрү боюнча жалпысынан 9 команда оюн көргөзөт: 7 облус жана Бишкек, Ош шаарлары.
Белгилүү болгондой, Улуттук көчмөндөр оюндары Талас облусунда 16-21-сентябрга чейин өтөт.
Эске сала кетсек, 2018-жылдын күз айында Ысык-Көл облусунда III Дүйнөлүк көчмөндөр оюндары өткөн. Анда оюндар Чолпон-Ата шаарындагы ат майданында жана Кырчын жайлоосунда өткөрүлгөн. Спорттун 37 түрү боюнча мелдештер өткөрүлүп, ага 74 өлкөнүн 2 миңден ашык спортчусу катышкан. Кийинки Дүйнөлүк көчмөндөр оюндары 2020-жылы Түркияда өтөт.
Ал эми улуттук көчмөндөр оюндары Кыргызстандын ар бир облусунда жыл сайын өткөрүлүп турат.
Пикир
Оставить комментарий