Бишкек, 14.02.22. /Кабар/. Коронавируска каршы Республикалык штаб "Спутник V" вакцинасынын кандай каршы көрсөтмөлөрү бар экендиги тууралуу маалымат даярдады.
Эмдөө эки этапта жүргүзүлөт: алгач I компонент 0,5 мл дозада алынса, 21-күнү II компонент дагы 0,5 мл дозада алынат. Вакцина ийин булчуңга жасалат.
Каршы көрсөтмөлөр болуп төмөнкүлөр саналат:
- Спутник V вакцинасынын кандайдыр бир компонентине же ушуга окшош компоненттерди камтыган башка вакцинага жогорку сезгичтик (бул эмдөөнүн алдында бейтапты текшерүүдө дарыгер тарабынан такталат);
- анамнездеги оор аллергиялык реакциялар (буларга төмөнкүлөр кирет: Квинке шишиги, анафилактикалык шок);
- курч жугуштуу жана жугуштуу эмес оорулар – бул учурда, эмдөө, айыккандан 2-4 жума өткөндөн кийин жасалат. Оор эмес курч респиратордук вирустук инфекцияларда, ашказан-ичегинин курч жугуштуу ооруларында эмдөө дене табы турукташкандан кийин жүргүзүлүшү мүмкүн;
- өнөкөт оорулардын күчөшү - эмдөө ремиссия (калыбына келтирүү) башталгандан 2-4 жума өткөндөн кийин жасалат;
- 22 жумага чейинки кош бойлуулук жана эмчек эмизүү мезгили;
- 16 жашка чейин балдарга
Вакцинанын экинчи компонентин киргизүүгө каршы көрсөтмөлөр:
Эгерде биринчи эмдөөдөн кийин, анын кыйыр таасирери пайда болсо, бейтапка Спутниктин экинчи дозасынан медициналык бошотуу (медотвод) берилет. Аларга төмөнкүлөр кирет:
- анафилактикалык шок,
- оор жалпы аллергиялык реакциялар,
- карышуу, тырышуу синдрому, дене табынын 40°С жогору ж.б.
Кайрадан эмдөө аллергиялык реакция пайда болгон мурунку вакцинанын дозасын алгандан 3 айдан кийинки убакта башка вакцина менен жасалат.
Пикир
Оставить комментарий