Бишкек, 29.09.21. /Кабар/. Жалал-Абадда калкты коронавируска каршы эмдөө үчун 133 убактылуу эмдөө пункту ачылган. Бул тууралуу Саламаттык сактоо министрлигинин Жалал-Абад облусундагы координатору Замира Орунбаева брифингдин жүрүшүндө айтып берди.
Анын айтымында, 28-сентябрь күнүнө карата Жалал-Абад облусунда коронавирус боюнча эпидемиологиялык кырдаал туруктуу.
“Бүгүнкү күндө облустун аймагында COVID-19 оорусуна чалдыккан жарандарды дарылоо Аксы жана Көк-Жаңгак шаарында жайгашкан жалпы практикалык дарыгерлер борборунун жугуштуу оорулар бөлүмдөрүндө жүргүзүлүп жатат, бейтаптар азайгандыгына байланыштуу жана каражаттарды үнөмдүү пайдалануу үчүн башка кызыл зоналар жабылды”, - деди ал.
Ал белгилегендей, калкты коронавирустук инфекцияга каршы эмдөө максатында, облустун аймагында 133 убактылуу эмдөө пункттары ачылып, эмдөө иштери жүрүп жатат.
“2021-жылдын 28-сентябрына карата облус боюнча эмделе турган 435 миң 112 адамдын ичинен 137 миң 374 адам же 32% эмделген”, - деди Замира Орунбаева.
Пикир
Оставить комментарий